കോഴിക്കോട്: പ്രായപൂർത്തിയാകാത്ത ആൺകുട്ടിയോട് ലൈംഗികാതിക്രമം നടത്തിയ കേസിൽ മധ്യവയസ്കൻ അറസ്റ്റിൽ. ചെറുവണ്ണൂർ നല്ലളം സ്വദേശി പേരൂർ പറമ്പിൽ വീട്ടിൽ മൂസക്കോയ (62) ആണ് നല്ലളം പൊലീസിന്റെ പിടിയിലായത്.
13 വയസ്സ് മാത്രം പ്രായമുള്ള ആൺകുട്ടിയെ സ്കൂട്ടറിൽ കയറ്റി കൊണ്ടുപോയി പൂളക്കടവ് പാലത്തിന് സമീപത്ത് നിർത്തിയിട്ട കാറിൽ വച്ചാണ് പ്രതി ലൈംഗികാതിക്രമം നടത്തിയത്. സംഭവത്തെ തുടർന്ന് ആൺകുട്ടി നൽകിയ പരാതിയുടെ അടിസ്ഥാനത്തിലാണ് പൊലീസ് അന്വേഷണം ആരംഭിച്ചത്.
നല്ലളം സ്റ്റേഷൻ ഇൻസ്പെക്ടർ ബിജു പ്രകാശിന്റെ നേതൃത്വത്തിലുള്ള പൊലീസ് സംഘമാണ് പ്രതിയെ പിടികൂടിയത്. സബ് ഇൻസ്പെക്ടർ ആനന്ദ്, അസിസ്റ്റന്റ് സബ് ഇൻസ്പെക്ടർ രാജീവ് കുമാർ, സീനിയർ സിവിൽ പൊലീസ് ഓഫിസർമാരായ സനത്റാം, രഞ്ജിത്ത്, സിവിൽ പൊലീസ് ഓഫിസർ അരവിന്ദ് എന്നിവരും സംഘത്തിൽ ഉണ്ടായിരുന്നു.
പോക്സോ നിയമപ്രകാരം കേസ് രജിസ്റ്റർ ചെയ്താണ് അറസ്റ്റ് രേഖപ്പെടുത്തിയത്. തുടർന്ന് പ്രതിയെ കോടതിയിൽ ഹാജരാക്കി റിമാൻഡ് ചെയ്തു. കുട്ടികളുടെ സുരക്ഷയ്ക്ക് കൂടുതൽ ജാഗ്രത പാലിക്കണമെന്ന് പൊലീസ് അറിയിച്ചു.
സമാനമായ സംഭവങ്ങൾ ശ്രദ്ധയിൽപ്പെട്ടാൽ ഉടൻ തന്നെ പൊലീസിനെയോ ചൈൽഡ് ഹെൽപ്ലൈൻ 1098 നമ്പറിലോ വിവരം അറിയിക്കണമെന്നും അധികൃതർ നിർദ്ദേശിച്ചു. സംഭവത്തെ കുറിച്ച് കൂടുതൽ അന്വേഷണം നടക്കുന്നുണ്ട്.
