തിക്കോടി: യാത്രക്കാരുടെയും നാട്ടുകാരുടെയും പ്രതിഷേധങ്ങള്‍ക്ക് പുല്ലുവില കല്‍പ്പിച്ച് തിക്കോടിയില്‍ വീണ്ടും സ്വകാര്യ ബസ് യാത്രക്കാരെ ഉയരപ്പാതയില്‍ ഇറക്കിവിട്ടു. കോഴിക്കോട് നിന്നും കണ്ണൂര്‍ ഭാഗത്തേക്ക് പോകുകയായിരുന്ന പടന്നയില്‍ ബസാണ് രണ്ട് സ്ത്രീകളും ഒരു പുരുഷനും അടങ്ങുന്ന യാത്രക്കാരെ തിക്കോടി ടൗണില്‍ ഉയരപ്പാതയില്‍ ഇറക്കിവിട്ടത്. ഇന്ന് രാവിലെ ഒമ്പതരയോടെയായിന്നു സംഭവം.
കൊയിലാണ്ടിയില്‍ നിന്നും തിക്കോടിയിലേക്ക് ടിക്കറ്റെടുത്തതായിരുന്നു മൂന്നുപേരും. പൊരിവെയിലില്‍ ദേശീയപാതയില്‍ ഇറക്കവിട്ടതോടെ ഇവര്‍ താഴെ ഇറക്കാന്‍ ഒരു കിലോമീറ്ററോളം നടന്ന് തിക്കോടി പഞ്ചായത്ത് ബസാര്‍ ഭാഗത്തേക്ക് പോകേണ്ടിവന്നു.
ആറുവരിപ്പാതയിലെ സര്‍വ്വീസ് റോഡിലെ സ്‌റ്റോപ്പുകള്‍ ഒഴിവാക്കി സ്റ്റേജ് കാര്യേജ് ബസുകള്‍ സര്‍വ്വീസ് നടത്തരുതെന്ന് മോട്ടോര്‍വാഹന വകുപ്പ് കര്‍ശനമായി നിര്‍ദേശിച്ചിരുന്നു. എന്നിട്ടും തിക്കോടി ഭാഗത്ത് ബസുകള്‍ സ്‌റ്റോപ്പുകള്‍ ഒഴിവാക്കി ഉയരപ്പാതയിലൂടെ സര്‍വ്വീസ് നടത്തുന്നത് പതിവാണ്. കഴിഞ്ഞദിവസം ഇത്തരത്തില്‍ യാത്രക്കാരെ ഹൈവേയില്‍ ഇറക്കിവിടാന്‍ ശ്രമിച്ചതിനെ തുടര്‍ന്ന് യാത്രക്കാര്‍ പ്രതിഷേധിക്കുകയും ബസ് ഒരു കിലോമീറ്ററോളം പിന്നോട്ടെടുത്ത് യാത്രക്കാരെ സ്‌റ്റോപ്പില്‍ ഇറക്കേണ്ടിവരികയും ചെയ്തിരുന്നു.
ആറുവരിപ്പാതയില്‍ ഒരിടത്തും വാഹനങ്ങള്‍ നിര്‍ത്തിയിടാനോ ആളുകളെ ഇറക്കാനോ അനുമതിയില്ലെന്നിരിക്കെയാണ് സ്വകാര്യ ബസുകള്‍ യാത്രക്കാരെ ഹൈവേയില്‍ ഇറക്കിവിടുന്നത്.
