കൊച്ചി: കേരളത്തില് സ്വര്ണവില വീണ്ടുമുയര്ന്നു. ഗ്രാമിന് 110 രൂപയുടെ വര്ധനയാണ് ഉണ്ടായത്. ഒരു ഗ്രാം സ്വര്ണത്തിന്റെ വില 14,710 രൂപയായി ഉയര്ന്നു. പവന്റെ വിലയില് 880 രൂപയുടെ വര്ധനവുണ്ടായി. പവന്റെ വില 1,17,680 രൂപയായാണ് വര്ധിച്ചത്. 18 കാരറ്റ് സ്വര്ണത്തിന്റെ വിലയും ഉയര്ന്നു. 90 രൂപയുടെ വര്ധനവാണ് രേഖപ്പെടുത്തിയത്. ഗ്രാമിന് 12,085 രൂപയായും പവന് 96,680 രൂപയായും വില വര്ധിച്ചു.
ആഗോള വിപണിയില് സ്വര്ണവില വീണ്ടും ഉയര്ന്നു. തുടര്ച്ചയായ മൂന്നാം ആഴ്ചയും നേട്ടത്തില് വ്യാപാരം അവസാനിപ്പിക്കാനുള്ള തയ്യാറെടുപ്പിലാണ് സ്വര്ണം. വെള്ളിയാഴ്ച സ്പോട്ട് ഗോള്ഡ് വില 0.5 ശതമാനം ഉയര്ന്ന് ഔണ്സിന് 4,540.18 ഡോളറിലെത്തി. ജൂണ് ആദ്യവാരത്തിന് ശേഷമുള്ള ഏറ്റവും ഉയര്ന്ന നിലവാരമാണിത്. ഈ ആഴ്ച മാത്രം സ്വര്ണവില 3.6 ശതമാനം ഉയര്ന്നു. യുഎസ് ഗോള്ഡ് ഫ്യൂച്ചേഴ്സ് വിലയും 0.6 ശതമാനം ഉയര്ന്ന് 4,596.60 ഡോളറിലെത്തി.യുഎസ് ഡോളറിന്റെ ദൗര്ബല്യമാണ് സ്വര്ണവിലയ്ക്ക് പ്രധാന പിന്തുണ നല്കുന്നത്. ഡോളര് ദുര്ബലമാകുമ്പോള് മറ്റ് കറന്സികള് കൈവശമുള്ള നിക്ഷേപകര്ക്ക് ഡോളറില് വില നിശ്ചയിക്കുന്ന സ്വര്ണം കൂടുതല് ആകര്ഷകമാകും.
