തിരുവനന്തപുരം: സംസ്ഥാനത്തെ 38 തദ്ദേശ വാർഡുകളിലേക്ക് നടന്ന ഉപതെരഞ്ഞെടുപ്പിന്റെ ഫലപ്രഖ്യാപനം പുരോഗമിക്കുന്നു. കഴിഞ്ഞ ദിവസം നടന്ന വോട്ടെടുപ്പിൽ 58.81 ശതമാനം പോളിങ്ങാണ് രേഖപ്പെടുത്തിയത്. ഏറ്റവും കൂടുതൽ പോളിങ് കണ്ണൂർ ജില്ലയിലാണ് 84.55 ശതമാനം, ഏറ്റവും കുറവ് കോട്ടയത്ത് 54.24 ശതമാനം. കൊല്ലം, ആലപ്പുഴ ഒഴികെ 12 ജില്ലകളിലായി രണ്ട് കോർപ്പറേഷൻ വാർഡുകളിലും മൂന്ന് മുനിസിപ്പാലിറ്റി വാർഡുകളിലും മൂന്ന് ജില്ലാ പഞ്ചായത്ത് വാർഡുകളിലും ഏഴ് ബ്ലോക്ക് പഞ്ചായത്ത് വാർഡുകളിലും 23 ഗ്രാമപഞ്ചായത്ത് വാർഡുകളിലുമാണ് തെരഞ്ഞെടുപ്പ് നടന്നത്.
കോഴിക്കോട് കോർപ്പറേഷൻ കുറ്റിച്ചിറ വാർഡ് യുഡിഎഫ് നിലനിർത്തി. യുഡിഎഫിന്റെ ഫർസീന അറയ്ക്കൽ 436 വോട്ടിന്റെ ഭൂരിപക്ഷത്തിലാണ് വിജയിച്ചത്. കൊച്ചി കോർപ്പറേഷൻ അയ്യപ്പൻകാവ് ഡിവിഷനും യുഡിഎഫ് നിലനിർത്തി. തൃശൂർ ചേലക്കര കുറുമലയിൽ ഇടതുകോട്ടയിൽ യുഡിഎഫ് അട്ടിമറി ജയം നേടി. തളിക്കുളത്ത് എൽഡിഎഫ് സിറ്റിങ് സീറ്റ് നിലനിർത്തി, വിജി കൃഷ്ണഘോഷ് 28 വോട്ടിനാണ് ജയിച്ചത്. ചാലക്കുടി മുനിസിപ്പാലിറ്റി 24-ാം വാർഡ് യുഡിഎഫ് നിലനിർത്തി, വി.ഒ പൈലപ്പൻ 339 വോട്ടിന് വിജയിച്ചു.
പാലക്കാട് പട്ടഞ്ചേരിയിൽ എൽഡിഎഫിലെ ബിന്ദു കുമാരി 18 വോട്ടിന് വിജയിച്ചു, 533 വോട്ട് നേടിയപ്പോൾ യുഡിഎഫ് 515 വോട്ടും എൻഡിഎ 21 വോട്ടും നേടി. എന്നാൽ ചിറ്റൂർ പരുത്തിക്കാവ് വാർഡിൽ അപൂർവ സംഭവം അരങ്ങേറി, യുഡിഎഫും എൽഡിഎഫും 433 വോട്ട് വീതം നേടി തുല്യത പാലിച്ചതോടെ ടോസിലൂടെ വിജയിയെ നിർണയിക്കും. ശ്രീകൃഷ്ണപുരം രാഗം കോർണർ യുഡിഎഫ് 48 വോട്ടിന് പിടിച്ചെടുത്തു, കരിമ്പ വെട്ടം 13-ാം വാർഡിൽ എ.എ അബ്ദുൽ ജലീൽ 335 വോട്ടിന് വിജയിച്ചു. മലമ്പുഴ ഹേമാംബിക നഗർ എൽഡിഎഫ് നിലനിർത്തി.
കണ്ണൂരിൽ ഉപതെരഞ്ഞെടുപ്പ് നടന്ന രണ്ടിടത്തും എൽഡിഎഫിനാണ് ജയം. പെരളശ്ശേരി ആറാം വാർഡ് യുഡിഎഫിൽ നിന്ന് 65 വോട്ടിന് പിടിച്ചെടുത്ത് കെ.വി രതീശൻ വിജയിച്ചപ്പോൾ മട്ടന്നൂർ ഉരുവച്ചാൽ എ.കെ സുരേഷ് കുമാർ 276 വോട്ടിന് നിലനിർത്തി. മലപ്പുറത്ത് മങ്കട കടന്നമണ്ണ സിപിഐ 48 വോട്ടിന് നിലനിർത്തി, താനാളൂർ മൂലയ്ക്കലിൽ മുസ്ലിം ലീഗിലെ വി.പി.ഒ ബുഷറ 488 വോട്ടിന്റെ ഭൂരിപക്ഷത്തിൽ വിജയിച്ചു, വേങ്ങര മൂന്നാം വാർഡിൽ ഹസീന ഫസൽ 880 വോട്ടിന്റെ വലിയ ഭൂരിപക്ഷത്തിലും ജയിച്ചു. എറണാകുളം പൂതൃക്ക കോലഞ്ചേരി ഈസ്റ്റ് ട്വന്റി20 339 വോട്ടിന് നിലനിർത്തി, വടക്കേക്കര മടപ്ലാതുരുത്ത് കിഴക്ക് യുഡിഎഫും പാറക്കടവ് പുളിയനം എൽഡിഎഫും നിലനിർത്തി. തിരുവനന്തപുരം മംഗലപുരം മുണ്ടയ്ക്കൽ എൽഡിഎഫ് 139 വോട്ടിന് പിടിച്ചെടുത്തപ്പോൾ തിരുപുറം പഴയകട യുഡിഎഫ് നിലനിർത്തി, വർക്കല ഒറ്റൂരിൽ എൽഡിഎഫിലെ പി ബീന വിജയിച്ചു. കാസർകോട് പിലിക്കോട് രണ്ടാം വാർഡ് സിപിഎമ്മിലെ ടി. ഓമന 297 വോട്ടിന്റെ ഭൂരിപക്ഷത്തിൽ നിലനിർത്തി.
