തിരുവനന്തപുരം: പൊതുവിഭാഗം റേഷന് കാര്ഡുകള് മുന്ഗണനാ വിഭാഗത്തിലേക്ക് തരംമാറ്റുന്നതിനുള്ള അപേക്ഷ സമര്പ്പിക്കാനുള്ള അവസാന തീയതി ജൂലൈ 20 വരെ നീട്ടി. ഒഴിവാക്കല് മാനദണ്ഡങ്ങളില് ഉള്പ്പെടാത്ത വെള്ള, നീല റേഷന് കാര്ഡ് ഉടമകള്ക്കാണ് പി.എച്ച്.എച്ച് വിഭാഗം അഥവാ പിങ്ക് കാര്ഡിലേക്ക് മാറാന് അവസരം ലഭിക്കുന്നത്.
അര്ഹതയുള്ള മുന്ഗണനേതര റേഷന് കാര്ഡ് ഉടമകള്ക്ക് ബന്ധപ്പെട്ട രേഖകള് സഹിതം അപേക്ഷ സമര്പ്പിക്കാം. അക്ഷയ കേന്ദ്രങ്ങള് വഴിയോ ecitizen.civilsupplieskerala.gov.in എന്ന സിറ്റിസണ് ലോഗിന് പോര്ട്ടല് മുഖേനയോ ഓണ്ലൈനായി അപേക്ഷ നല്കാം എന്ന് ജില്ലാ സപ്ലൈ ഓഫീസര് അറിയിച്ചു.
സംസ്ഥാനത്ത് ഭക്ഷ്യധാന്യ വിതരണ സംവിധാനം കൂടുതല് കാര്യക്ഷമമാക്കുന്നതിന്റെ ഭാഗമായാണ് റേഷന് കാര്ഡ് പുനഃപരിശോധനയും തരംമാറ്റവും നടത്തുന്നത്. നിലവില് പൊതുവിഭാഗത്തിലുള്ളതും എന്നാല് മുന്ഗണനാ ആനുകൂല്യങ്ങള്ക്ക് അര്ഹതയുള്ളതുമായ കുടുംബങ്ങള്ക്ക് ഈ അവസരം പ്രയോജനപ്പെടുത്താം.
പിങ്ക് കാര്ഡ് ലഭിക്കുന്നതോടെ സബ്സിഡി നിരക്കില് അരിയും മറ്റ് അവശ്യസാധനങ്ങളും കൂടുതല് അളവില് ലഭിക്കും. കൂടാതെ പി.എച്ച്.എച്ച് വിഭാഗക്കാര്ക്ക് സര്ക്കാരിന്റെ മറ്റ് ക്ഷേമ പദ്ധതികളുടെ ആനുകൂല്യങ്ങള്ക്കും മുന്ഗണന ലഭിക്കും.
അപേക്ഷയോടൊപ്പം വരുമാന സര്ട്ടിഫിക്കറ്റ്, തിരിച്ചറിയല് രേഖ, റേഷന് കാര്ഡിന്റെ പകര്പ്പ് എന്നിവ നിര്ബന്ധമായും സമര്പ്പിക്കണം. നിശ്ചിത മാനദണ്ഡങ്ങള് പാലിക്കുന്നുണ്ടെന്ന് ഉറപ്പുവരുത്തിയ ശേഷം മാത്രമേ അപേക്ഷ അംഗീകരിക്കുകയുള്ളൂ. ജൂലൈ 20 ന് ശേഷം ലഭിക്കുന്ന അപേക്ഷകള് പരിഗണിക്കില്ലെന്നും അധികൃതര് വ്യക്തമാക്കി. "അര്ഹരായവര് അവസാന തീയതി കാത്തുനില്ക്കാതെ എത്രയും വേഗം അപേക്ഷ സമര്പ്പിക്കണമെന്ന് സിവില് സപ്ലൈസ് വകുപ്പ് അഭ്യർത്ഥിച്ചു.
