വടകര: കൈനാട്ടി ദേശീയപാതയിൽ റോഡരികിൽ നിർത്തിയിട്ടിരുന്ന കാറിന് തീപിടിച്ച് വാഹനം പൂർണമായി കത്തിനശിച്ചു. ഇന്ന് ഉച്ചയ്ക്ക് 12 മണിയോടെയായിരുന്നു സംഭവം.
കൈനാട്ടിയിലെ കാർ ഷോറൂമിലെ ജീവനക്കാരനായ ജസീറിന്റെ കാറാണ് കത്തിനശിച്ചത്. രാവിലെ 9 മണിയോടെ ഷോറൂമിന് സമീപം റോഡരികിൽ പാർക്ക് ചെയ്ത് പോയ കാറിനാണ് ഉച്ചയോടെ തീപിടിച്ചത്.
ഉച്ചയോടെ കാറിനുള്ളിൽ നിന്ന് പുക ഉയരുന്നത് സമീപത്തെ വ്യാപാരികളുടെയും നാട്ടുകാരുടെയും ശ്രദ്ധയിൽപ്പെടുകയായിരുന്നു. തുടർന്ന് ഇവർ തീ അണയ്ക്കാൻ ശ്രമിച്ചെങ്കിലും നിമിഷങ്ങൾക്കകം തീ ശക്തമായി പടരുകയായിരുന്നു. കാറിന്റെ മുഴുവൻ ഭാഗങ്ങളും കത്തിനശിച്ചു.
അപകടസമയത്ത് കാറിനുള്ളിൽ ഒരു ലാപ്ടോപ്പ് ഉണ്ടായിരുന്നതായും വിവരമുണ്ട്. വിവരമറിഞ്ഞ് വടകരയിൽ നിന്ന് ഫയർഫോഴ്സിന്റെ രണ്ട് യൂണിറ്റുകൾ സ്ഥലത്തെത്തി ഏറെ ശ്രമത്തിനൊടുവിലാണ് തീ നിയന്ത്രണവിധേയമാക്കിയത്. തീപിടിത്തത്തിൽ ആളപായം റിപ്പോർട്ട് ചെയ്തിട്ടില്ല. വാഹനത്തിന് തീപിടിക്കാനുള്ള കാരണം വ്യക്തമല്ല.
