ബാക്കു: പ്രഥമ FIFA അണ്ടർ-15 വേൾഡ് കപ്പിൽ തകർപ്പൻ ജയവുമായി ഇന്ത്യ. ഗ്രൂപ്പ് K യിലെ രണ്ടാം മത്സരത്തിൽ കരുത്തരായ കാമറൂണിനെ 2-1ന് ഇന്ത്യ പരാജയപ്പെടുത്തി.
ബാക്കുവിലെ ഹോവ്സാൻ കോംപ്ലക്സിൽ നടന്ന മത്സരത്തിൽ കാമറൂൺ താരം ഫറെയിൽ എൻഗോബോയുടെ ഓൺ ഗോളിലൂടെ (1-ാം മിനിറ്റ്) ഇന്ത്യ ആദ്യം മുന്നിലെത്തി. എന്നാൽ ആദ്യ പകുതി അവസാനിക്കാൻ തൊട്ടുമുൻപ് ഇന്ത്യൻ താരം മുഹമ്മദ് സൊഹൈൽ ഖാന്റെ ഓൺ ഗോളിലൂടെ കാമറൂൺ സമനില പിടിച്ചു (20-ാം മിനിറ്റ്).
രണ്ടാം പകുതിയിൽ ക്യാപ്റ്റൻ ആർ. ലാൽറെംറുവാത്ഫെല (27-ാം മിനിറ്റ്) നേടിയ ഗോളിലൂടെ ഇന്ത്യ വീണ്ടും മുന്നിലെത്തി. പിന്നാലെ ഗോൾകീപ്പർ ജെനിറ്റ് നിങ്തൗജം നടത്തിയ ഉജ്ജ്വല സേവുകൾ, ഒരു പെനാൽറ്റി രക്ഷപ്പെടുത്തിയതടക്കം, ഇന്ത്യയുടെ വിജയം ഉറപ്പിച്ചു.
മഴയെ അവഗണിച്ച് പൊരുതിയ ബിബിയാനോ ഫെർണാണ്ടസിന്റെ ബ്ലൂ കോൾട്ട്സ് ഗ്രൂപ്പ് K യിൽ രണ്ട് മത്സരങ്ങളും ജയിക്കുന്ന ഏക ടീമായി മാറി.
ആദ്യ മത്സരത്തിൽ ലാവോസിനെ 4-2ന് തോൽപ്പിച്ചതിന് പിന്നാലെയാണ് കാമറൂണിനെതിരെയുള്ള ഈ നിർണായക ജയം. ഇന്ത്യ ഇന്ന് തന്നെ ഗ്രനേഡയെ നേരിടും, നാളെ ബഹ്റൈനെയും സെനഗലിനെയും നേരിടുന്നതോടെ യോഗ്യതാ റൗണ്ട് പൂർത്തിയാകും.
